33 Gulle
HAYDAR IŞIK
Tirkîye
welatekî giring e, ewil qetil dike, paşê navê qatil dide taxî, bajêrkî
û bajêrî. Eve jî têra nake, li betenên çîyayên Kurdistanê bi kişlê
”Tirkek bedelî cîhanê ye!” dinivîse. Tirkîye welatekî giring e, hem
dibêje ez demokratîk im, li dûv ra jî bi navê demokrasîyê navên timamî
gundên Kurdan dike Tirkî.
Tirkîyeyê,
mirovê Kurd hind şkandîye ku, pêşîyê qetil dike, paşê jî
berê xwe dide nîveka çavên me û an navê qatilî, anjî heykelê wî tîne
li ber me diçikilîne. Ma navên qatilên Dêrsimê nedan cade û kolanan? Ewil
ji Ehmed Arifê rehmetî, paşê jî ji wê serpêhatîye gelek xweş ya
Günay Aslanî em bi 33 Gulleyê hesîyabûn, qatilê 33 Kurdan General Mustefa
Muğlalî, ne li Izmîrê, Stanbolê, li cihê ku qetilam kirî derêxistin
pêşîya Kurdan.
Heke
Kurdan eve daûra, eve tête wê manayê ku gelek tişt ji me birine. Tête
wê manayê ku em xwe nasnakin. Tête wê manayê ku, em dê we careke dî
bikujin. Tête wê manayê ku, nevîyên 33 Kurdên hatine kuştin, gava biçine
leşkerîyê li binkeya leşkerî ya qatilî, hizar car bila bêne kuştin.
Ataturk, Fevzî Çakmak, Inönü, Salih Omurtak, Kazim Karabekir, Abdullah Alpdoğan,
Ali Fethî Esener, Teoman Koman, Doğan Güreş... û hêj gelek yên dî,
heçku xwûna Kurdan ya rêhtî têra nake, vê carê jî bustên wan, heykel û
navên wan ji bo cografyaya me têne dan. Eve tête wê manayê ku, Kurd bila
heroj bimirin. Gelo Kurd dê vê
bixwin?
Tirkîye
welatekî giring e, ji ber ku dê tankên me yên Leopard, firokeyên alfa, apaçî
û hemû sîlehên me bikire, em dengê xwe lê nekin, neêşînin ku malê
me bikire, dibêjin hemû rojava (Amerîka û Ewrûpa). Elmanyaya ku ez zimanê
wan elimî me, heroj rojnameya wan dixwûnim, hevwelatîyê wan im; berî hukûmeta
SPD (Partîya Sosyaldemokrat ya Elmanyayê) + Keskan, Tirkîyeyê gelek sîleh jê
dikirîn. Nihe, wisa tête hizir kirin ku, sosyaldemokrat û keskan firotina sîlehan
nerawestandibe jî, kêm kirine. Heke hûn wisa hizir dikin, hûn xwe dilêhbînin,
çiku di demê vê hukûmetê da ji berê zêdetir sîleh hatine firotin bo Tirkîyeyê.
Claudia Roth, wekî di muxalefetê da digel me dost bû, belêm gava bû seroka
partîyê, dîyar e hindekan pif kire guhê wê ku ser û silav ji me birîn. Di
çapemenîyê da belav bû ku, serokê li paş perdeyê yê Rothê Joschka
Fischerî (Wezîrê derve), roleke mezin leyistîye ku Kongreya Gel di nav lîsteya
terorê da cih bigire. Gava li tabloya bi giştî bête nêrîn, dê nameya
Leyla Zanayê bête têgihiştin. Eve
çi dostayetî ye? Kurdê ku Leyla Zana destekê didê, îzole bike, terorîst
îlan bike, paşê jî heçku qet tiştek nebûy here bêje ”ez hatime
seradanîya hevala xwe!”.
Polîtîk
li ser berjewendîyê tête kirin, ku vê yêkê êdî zarok jî dizanin. Di polîtîkê
da, li bihayên wekî wijdan û etîkê geryan beyhûde ye. Wekî em berê xwe
didin ku partîyên SPD û Keskan ji kî derê bo kî derê belav bûne, vê çendê
dibînin. Bi taybetî Partîya Keskan, fonksîyona ”Klûba Tirk” bi cih tîne.
Di nêrîna piranîya welatên EUyê (Yêkitîya Ewrûpayê) da, domandina statûkoyê
li pêş e; mafên mirov, demokrasî, aştî, azadî , ji bo wan gelek
pare nake. Herwekî Elmanyayê polîtîka Kurd nebe, ne partîyên dewletê, nejî
yên muxalefetê polîtîkeke wisa heye. Ez bêjim ev rewşe li welatên dî
yên EUyê jî ferq nake.
Heke
rewş wisa be, heqê Kurdan jî heye ku li vê dinyayê bo xwe li cihekê
bigerin. Vê gavê hêşku Amerîka bûye cîranê me, boçi bi mejîyê çepîtîya
salên şêstî ku patînajê dike, em êrişî Amerîkayê bikin?
Berjewendîyên kê di vê da hene? Li vê derê, Kurd û dostên ku bi navê
wan dinivîsin, bi zanahî anjî nezanî şaşîyeke mezin dikin. Di dawîya
dawî da, hêza ku polîtîkê bi welatên Ewrûpayê dide kirin, dê her Amerîka
be. Amerîka di roja evro da, ji ber ku statûkoyê dihejîne, ji wan qelemên
ku xwe şoreşger dizanin, şoreşgertir e. Yê ku di vê negihe,
tête wê manayê ku dixwaze navê qatilê Kurd ji bo Kurd bête dan.
22
Gulan 2004, Şembî
Özgür
Politika
Kurdîya
wê: ROJAN HAZIM